|
شماره اول سال اول ماه ثور 1387 |
|
باش مقاله
بېللی که آیدین افغانستان فرهنگی اویوشمه سی بوندن ایککی ییل آلدین افغانستان اسلامی جمهوریتی عدلیه وزیرلیگیده ثبت و راجستر بۉلیب ایش بجریش جوازینی آلگن اېدی. آیدین افغانستان فرهنگی اویوشمه سی نینگ اصل هدفی اولکه میز افغانستان اولادینی اۉقیتیش ، فرهنگی ایشلر بجریش و آیدین بیر افغانستان نی وجود گه کېلتیریش اوجون لازم سعی حرکتلرنی یۉلگه قۉییش دیر. اوشبو هدف یوزه سیدن اۉز یۉلیگه دوام اېتدیریب کېله دېگن آیدین افغانستان اویوشمه سی افغانستان نینگ بیرقطار ولایتلریده معارف و فرهنگ ساحه سیده معلوم ایشلرنی بجریب کېلماقده. میمنه، سرپل ، اندخۉی و تخار ده آیدین عالی کورسلری ، مزار شریف ده اویوشمه تمثیلچیلیگی آچیلیب فعالیت آلیب بارماقده.شونینگدیک او شبو کورس و تمثیلچیلیک لر یانیده آیدین بلخ ، آیدین فاریاب، آیدین اندخۉی و آیدین سرپل علمی و فرهنگی نشریه لر چاپ اېتیلیب اۉز خواننده لری قۉلیگه یېتیب بارماقده. بو نشریه لر همه سی محلی نشریه لر بۉلیب مذکور ولایتلر ده گی تورلی اجتماعی و فرهنگی مشکللرنی عکس اېتدیریب او یېرده گی اهالیگه ایریم علمی، اجتماعی و مدنی معلوماتلر یېتکزیش وظیفه سینی عملگه آشیره دی. آیدین افغانستان فرهنگی انجمنی ایلک بار اۉزی نینگ مرکزی نشریه سی یعنی آیدین مجله سی نینگ بیرینچی سانینی چاپ اېتیب اۉز اخلاصمندلریگه یېتکزیش امکانیگه اېریشگنیدن خرسند. آیدین مجله سی نینگ بیرینچی سانینی ینگی هجری شمسی ییل باشله نیلیشی بیلن نشر اېتیلیشیدن فایده له نیب اوشبو ییلنی مجله میز اۉقوچیلری آیدین افغانستان فرهنگی انجمنی اعضالری و برچه وطنداشلرگه قوتلوغ بۉلسین دېب ینگی ییل نی اولکه میز افغانستانگه آیدینلیک کېلتیریشینی تمنی اېته من. آیدین مجله سی اۉزبېکچه، تورکمنچه، دری، پشتو، تورکچه و انگلیس تیللریده چاپ اېتیله دی. آیدین مجله سی، اۉقووچیلری نینگ یاردمیگه احتیاجی بار.عزیز اولکه داشلریمیز مذکور تیللر ده علمی، فرهنگی، ادبی و تاریخی یازوو و مقاله لری بیلن بیزگه یاردملرینی ایه مسلردېگن امیدده میز. بیز اولکه داشلریمیز اوچون و اولکه داشلریمیز امیدی بیلن بو یۉلده قدم تشله ماقده میز. عزیز اولکه داشلر هر تورلی یازو و یاردملرینگیز نی کوتیب توره میز . ساغ و بختیار بۉلینگ...
عبدالرحیم معصومی آیدین افغانستان مجله سی مسوول مدیری
|