|
شماره سوم سال اول ماه سرطان 1387 |
|
مېن قرّیب من می؟! یازووچی: محمدحلیم یارقین
باشقه انسانلر قطاری مېن هم توغیلیب، وایهگه یېتدیم. یاشلیک و ییگیتلیک نینگ چوچوک و قووناق دورلرینی سوریب، هنوز یخشی اۉزیمگه کېلمسدن قریلیک چاووشی اېشیکنی قاقدی و شو بیلن بیرگه آپاق قارلر هم استه-سېکین باشیمگه یاغه باشلهدی! بیروقت قرهسم، قار بوتون تاملر، درختلر شاخی و تاغلرنی قاپلب آلگندېک، مېنینگ باشیمنی هم بوس-بوتون قاپلب آلگن! هه عزیزلر، مېن اېسه کۉنگلیم، ذهنیم و وضعیتیمگه کۉره همان یاش بۉلیب، اونچهلیک کېسکین اۉزگریش سېزمسم هم، بیراق اویدن ایشخانهگچه؛ کۉچه و محلهمیزدن شهر و بازارگچه اوچرهشگن آدملرنینگ مناسبتلری و فکرلری مېنگه نسبتاً نېگه دیر اۉزگریب، ایلگریلردن اۉزگچه بۉلیب قالدی! ایلگریلر، آدملر بیلن قرشی کېلیب اوچرهشگنیمده، اولر جوده قووناق، اېرکین و خوش چقچقلیک بیلن کۉروشیب، حال و احوال سۉرهشیب، حتی یېلکهمگه قاقیب یا بدنیمنی تورتیب سۉزلسهلر-ده، اېندی بۉلسه آدملر باسیقلیک، آغیرلیک و حرمت بیلن باش اېگیب، رسمیلرچه احوال سۉرهب، مېن سۉزلمهگونچه، اولر سۉزلمهی آغزیمگه تیکیلیب تورردیلر! جایلرده اېسه آقسقال دېب، بیرینچیدن مېنی آلغه باشلردیلر! هه، یورهکده یاش و کۉنگلیم ایسته مسه هم، آدملر مېن بېچارهنی قریلر قطاریگه زۉرغه کیریتیب، شو یاشگه ماس حرکتلرنی مېن بیلن باشلهدیلر! بو ایشلر مېن اوچون قنچهلر ینگی و یاقیملی بۉلسه هم، بیراق نېگه دیر گاهیده ییگیتلرنی مېندن اۉزلرینی آلیب قاچگندېک سېزردیم. شونده، نظریمده یورهگیمنی بیر نوع غشلیک و توشکونلیک استه-سېکین غیجیملهیاتگندېک تویولردی. ساچیم آقریب، قریلر قطاریگه قۉشیلگنیم باعث تاپیلگن قیینچیلیکلر و ماجرالر جوده کۉپ و خیلمه-خیل. اولرنینگ هر بیری اۉزی علیحده بیر داستان! بو یېرده، مېن فقط اوییمدهگی یوز بېرگن کۉپلب عجایب ماجرالردن بیر نېچه سینی حکایه قیلیب بېرهمن. باشیم استه-سېکین آقهریب کېلهیاتگنینی طبیعی حال دېب اۉیلب، بېملال و تشویشسیز کونیکیب کېلهیاتگن بیر پیتده، عادی بیر حادثه بو حالت بیر آدم اوچون قنچهلر دهشتلی اېکنینی پیقب قالدیم: بیر جمعه کونی توشده، اۉغلیم بیر نېچه همکارلرینی مهمان قیلگن اېدی. شونده عیالیمگه قرهب: - آنهسی، مېن هم مهمانلر بیلن توشلیک قیلهمن، دېدیم. شونده، کوتیلمهگن عجایب جوابنی عیالیمدن اېشیتدیم: - آتهسی، بو نیمه دېگنیز؟ اېندی ساچلریزگه آق توشیب، قریدینگیز. یاشلرنی اۉز حاللریگه قۉیسنگیز بۉلمهیدی می؟ - خاتین، بو قندهی گپ؟ حالی مېنی یوز گلیمدن اۉن گلیم هم آچیلمهی، قریب قالدیم می؟ - سیز آتدن توشیب، اېگردن توشگنیز یۉق، شیکیللی. سیز بیلن یاشلرنینگ ارهلرینگیزده بیر عالم فرق بار. باریب اولرنی قید قیلیب نیمه کېرهگی بار! خاتینیم نینگ بو سۉزلری نیمه مقصدده ایتیلگن بۉلسه هم، باشیمگه خودی بیر بالقه بیلن محکم ضربه اورگندېک بۉلدی. ایچیمگه توتب، جیم بۉلیب، کونیکیشدن اۉزگه علاجیم یۉق اېدی! کونلر اۉتیب، عیالیم مینی دوگانهلری نینگ بیریده «آتهسی» اۉرنیگه «چالیم» دېب سۉزلهیاتگنینی هم اېشیتیب قالدیم! فقط جیمگینه ایچیمگه توتب کېتدیم! بیر کونی ایاغیم بیر کېسککه تېگیب، مودرهب کېتدیم. عیالیم بیلن قیزیم یوگوریب کېلیب، قۉلتیغیمدن کۉتردیلر. شونده عیالیم دېدی: - قریلیک یمان-ده. کیشیدن مدار کېتیب، سلگه ییقیلیب، بیرار یېری سینیب یا چیقیشی هم ممکن، احتیاط قیلسنگیز-چی! نه چاره، «باشگه توشگننی، کۉز تارتر» دېگنلریدېک، بوندهی اچیق سۉزلرنی او-بودن جیم توریب اېشیتیشدن اۉزگه علاجیم یۉق اېدی! بیر کېچه عایله اعضاسی جمعالجمع بۉلیب اۉلتیرگنیمیزده، مېن تلویزیونده قیسی دیر سیاسی صحبتنی اېشیتماقچی بۉلدیم. عیالیم، قیز-اۉغیللریم سریال کۉرماقچی اېدیلر. کته اۉغلیم اېسه فلان فوتبال مسابقه سینینگ فاینلینی کۉرهمن، دېب ایاق تیرهب تورگن اېدی! شونده بیرآز جر و بحثدن سۉنگ، اولرنی ملامت قیلیب دېدیم: سیزلر ییگیرمه بیرینچی عصر آدملری بۉلیب، نېگه سیاسی و اجتماعی موضوعلرگه علاقه توتمهی، بو بېمعنی سریاللرنی کۉرهسیزلر؟ بو سۉزیم خودی زنبور اویهنی قۉزغهگندېک بۉلدی. اویدهگیلرنینگ برچهسی بیر جبههده توریب، مېنگه قرشی چیقدیلر! شو بحثلر جریانیده، عیالیم حل اېتووچی سۉزنی ایتدی: - چال جان، اېندی سیز قریب، یاشلر یاقتیرهدیگن کۉرستوولرنی یاقتیرمهیدیگن بۉلیب قالیبسیز. اۉزینگیزگه بیرار علیحده تلویزیون آلسنگیز یخشی بۉلهدی! هه دۉستلر، اېرتهسیدن باشلب، مېنگه علیحده بیر میده اتاقده میده بیر تلویزیونچه قۉییب، باشقهلردن اجرهتدیلر. بو هم یېتمهگندېک، سریال بهانهسیگه اولر حتی مېنینگ دسترخوانیمنی هم اۉزلریدن اجرهتیب، علیحده طعام بېرهباشلهدیلر! اېنگ قیزیغی و یمانینی اېشیتینگ: مېن یاشلیگیمدن اۉز آلدیمگه یاقتیرگن تورلی قۉشیق و اشولهلرنی خِیرگاهی (زمزمه) قیلیب اۉرگنگنمن. بونی قرهنگ که، قریلر گروهیگه کیریتیلگنیمدن سۉنگ، بیر کونی حویلی نینگ بیر چېکه سیده توریب، قیسی دیر اۉزبېک کلاسیک اشولهنی تیلیم نینگ تگیده سېکین زمزمه قیلیب تورگنیمده، میده قیزیم کۉریب قالدی. او اېسه حیرت بیلن تېلموریب، مېنگه هېچ نیمه دېمهی آنهسی تمانگه یوگوریب باریب: - آنه-آنه، آتهم اۉز باشلریگه گپیریب یاتیبدیلر، دېدی!! آنهسی اېسه: - میلی قیزیم. آدم قریسه میهسی چلغیب، توزوک ایشلهمهیدی، اۉز باشیگه تېتتیرهب سنهیدی!! - اونده آتهمنی بیرار اعصاب داکتریگه آلیب بارهیلیک! - تۉغری ایتهسن، قیزیم! آنه-قیز آرهلریدهگی اوشبو سۉزلرنی اېشیتیب، بوتون بدنیمنی لرزه و قۉرقوو توتدی و باشیمدن بیر سطل موزدېک سوو قوییلگندېک بۉلدی! هه عزیز اۉقووچیلر، انه شوندهی قیلیقلر و اۉتکیر سۉزلر هرکونی عصبلریمنی اېگاولب (سوهانلب) تورردی. مېن، تشلنگن قریلیک گردابیدن اۉزیمنی چیقارماقچی بۉلسم هم، بیراق باشقهلرنینگ فکری و حرکتلرینی اۉزیمگه نسبتاً اۉزگرتیرالمهی یاتیبمن! تېنگری عاقبتنی بخیر قیلسین-ده!! کابل-ثور 1387
|
