|
شماره چهارم و پنجم سال اول ماه اسد و سنبله 1387 |
|
ایپک یۉلی
امریکانینگ کلیفورنیا شهریدن کورستولر بېریب باره دیگن «نور» آتیده گی خصوصی تلویزیون آرقهلی هفته ده بیر بار اۉزبېک تیلیده کورسه تیله دیگن «ایپک یۉلی» برنامه سی اوزی نینگ ایککی یاشیگه کیردی. جسارت بیلن ایتیش کیره ک که «ایپک یۉلی» اۉزی نینگ بیر ییل لیک فعالیتی دوامیده کوپچیلیک تماشاچیلرگه معقول و منظور بۉلدی و اولرنینگ کونگلیدن اۉزیگه مناسب اورین اېگلَه دی. شو مناسبت بیلن بیرینچیدن «ایپک یۉلی» متصدی سی ملت سېور ژورنالست خانم فوزیه آرال حبیبی همده «نور» تلویزیونی مسوول لرینی صمیمانه تبریکلب، آلدینده گی ایشلری ده اولکن موفقیتلر تیله یمیز.
«ایپک یۉلی» کۉروچیلری دقتینی جلب اېتیشده، برنامه نی تیارلوچی فوزیه خانم نینگ رولی کته بۉلگنی گه هیچ قنده ی شک – شبهه یوق البته. تلویزیون برنامه لرینی تیارلش، عاموی اخبارات واسطه لریده قیلینه دېگن فعالیتلرنینگ اېنگ مشکلی و کوپ محنت، استعدادو قابلیت طلب قیله دېگن آغیربیر ساحه حسابلنه دی. اینیقسه اۉزبېکلر جماعه سیدن چیتده توریب، اۉزبېک تیلیده تلویزیون کورسه تولرینی تیارلب تقدیم ایتیش، قاله ویرسه کۉروچیلر آلقیشیگه سزوار بۉله دېگن درجه ده برنامه لر بېریش اوچون کته مهارت لازم . انه شو ساحه ده موجود امکانیت سیزلیکلر و تورلی قیین چیلیک لر گه قره می اۉزقابلیتینی کۉرسهتیب قیلیب بیر ییلدن بویان تلویزیون برنامه لرینی موفقیتلی طرزده آلغه آلیب باره یاتگن فوزیه آرال، تثنالرایتیشگه ارزیگولی انسان. اوزاق اوتمیشلردن بېری اۉز تیلی، ادبیاتی و مدنی – فرهنگی امکانلریدن بی بهره قالیب کېلگن افغانستان اۉزبېکلری آلدیده بوکون اۉز فرهنگی حیاتینی رواجلنتیریش اوچون هیچ قندهی قانونی تۉسیق موجود اېمس. شونده ی بیر مناسب شرایط دن فایده له نیش، افغانستان اۉزبېکلری اینیقسه فرهنگیلر، روشنفکرلر و قلم اهلیگه تېگیشلی مسأله. بیزنینگ فرهنگی لریمیز قه ییرده بۉلمه سینلر اوشبو ساحه ده اۉزلریدن جسارت کورسه تیب ایجابی سعی حرکتلرنی یۉلگه قوییشلری درکار. کلیفورنیادن نشر اېتیله دېگن « نور» خصوصی تلویزیونی آرقه لی هفته ده بیر مرته بیرساعتلیک «ایپک یۉلی» برنامه سی نینگ دوام ایتدیریلیشی بونگه یخشی مثال بۉلهآله دی. «ایپک یۉلی» اۉز فعالیتلری دوامیده افغانستان اۉزبېکلرینینگ بوکونگی حیاتی و اوتمیشیدن تورلی لوحهلر بیریش آرقه لی در حقیقت کته خذمت قیلیب کېلماقده. خارجده گی وطنداشلریمیزنی افغانستان ایچکریسیده گی احوال، اینیقسه اۉزبېکلرنینگ سیاسې، اجتماعې، اقتصادې و مدنی حیاتیدن آز می کوپ می باخبر قیلیب بارماقده. «ایپک یۉلی» اوز ادبی و فرهنگی برنامه لری آرقهلی افغانستان اۉزبېکلری نینگ مملکت ایچکریسیده گی فرهنگی فعالیتلری، شاعر ویازووچیلرنینگ ایجادی ایشلری و یوتوقلری توغریسیده معلوماتلربېریب، قطار ادبی سیمالریمیزنی تلویزیون کۉروچی لری گه تهنیتب باره یاتگنی هم علیحده تحسین گه سزاوار. حاضرگی کونده افغانستان اۉزبېکلرینینگ مملکت ایچکریسیده هم تشقریسیده هم نه فقط «ایپک یۉلی» کبی برنامه لر، بلکه شونگه اۉخشه گن اۉزبېک تیلیده کورسه تولر بیره دیگن تلویزیون لرگه احتیاجی بار. بونده ی بیر مهم آرزولرگه اېریشیش ملی غیرت، جسارت و فدایی لیک طلب قیله دی. بیرینچیدن بیزنینگ بای بدولت و ملی حس تویغوگه اېگه ملتداشلریمیزنینگ بو ساحه ده عملی قدملر تشلشلری کیره ک. عین حالده هربیر اۉزبېک هم کېله جکده بونده ی ملی – انسانی نیتلرگه اېریشیش اوچون به حال قدرت یاردم بېریب بیلهدی. مسأله نینگ بو تامانی البته ملی – مدنی تشکیلاتلریمیزنی هرتامانلمه قوللب قوتلش و حمایت اېتیش آرقهلی میسر بۉلیشی ممکن. بیز بوندهی اولکن آرزولرگه اېریشیشنی «ایپک یۉلی» و باشقه مدنی حرکتلرنی حمایه اېتیشدن باشله شیمیز کیره ک. افغانستانلیک اۉزبېکلر اینیقسه خارجده حیات کېچیره دېگن ملتداشلریمیز «ایپک یۉلی» نی قوللب قوتلب اونی کېله جکده وقت ساعتلری نی کۉپه ییشی و دنیا نینگ اکثریت منطقه لری جمله دن اروپا و آسیا اولکه لریده استقامت قیله دېگن اۉزبېکلر کوره دیگن درجه گه یېتیشی اوچون یاردم کورسه تیشلریگه احتیاج بار! « نور » تلویزیونی نینگ اۉزبېک تیلیده گی «ایپک یۉلی» کۉرستویی نی کۉریشنی ایسته سنگیز، مرحمت قیلیب، بیرینچیدن www.noor-tv.com سایتی نی آچینگ، سۉنگره www.GLwiz.com سایتیگه کیریب اۉزینگیزنی راجستر قیلینگ. «ایپک یۉلی» برنامهسینی سه شنبه کونلری کابل وقتی بیلن اېرتهلب ساعت 5 ده تماشا قیلیشینگیز ممکن.
محمد عالم کوهکن
|
