|
شماره چهارم و پنجم سال اول ماه اسد و سنبله 1387 |
|
یره اوستیگه چیپقان
دموکراسی نینگ تېز پیشر مېوهلریدن بیری حزبلر کۉپلیگی اېکن. هه، بیزنینگ یورتیمیزده هم اونینگ ایلک مېوهسی شو بۉلدی. آزگینه مبالغه بیلن ایتگنده، یورتیمیزده حزبلر سانی قیسقه بیر مدت ایچیده آدم باشیگه بیرتهدن تۉغری کېلهدیگن درجهده اۉسیب باردی. ایریم سیاسی کارشناسلربونینگ سببینی اۉتمیشدهگی « هرکوچهده بیرقومندان» بۉلگنی بیلن ایضاحلسهلر۔ده، بعضیلری بیزدهگی «هر کلهده بیرخیال» سرشتینی بو حالت نینگ سببچیسی اېکنلیگینی دلیل قیلیب کۉرستماقدهلر. میلی، خارجدن کېلگن دغدغه اېمس۔کو، اۉزیمیزنینگ ملي عنعنهمیز اېکن۔ده دېب، قناعتلنیشگه اورینیب یورگن بیر پیتده، بو کسللیک بدن ملکی نینگ هر بیرعضویگه یوقیب باره یاتگنینی الّه قیسی خارجی سیارهلیک خبرنگاردن اېشیت حیران بۉلدیم: بدن ملکیده تشکیل تاپگن ینگی بو حزبگه کیم رهبر بۉلسین؟ دېگن سوال اونینگ بوگونگی قورولتایی نینگ اساسي موضوعی دیر. بو حزب نینگ هر بیر عضوی اۉزینی بو مقامگه مناسب کۉریب، باش: «عقل و ادراک بولاغی مېنمن، مېنسیز برینگیز هیچیسز»، دېب اۉزینی رهبر بۉلیشگه حقلی بیلسه، یورهک: «حیات اۉچاغی مېنمن، مېن بۉلمسم، سېن هیچسن» دېب، بو مقامنی اۉزیگه مناسب کۉرردی. کۉز: «یۉق، یۉل کۉرستووچی مېنمن، مېن بۉلمسم سیزلر هیچیسیز» دېسه، قۉل: «یۉق، مېن بجرمسم، بولاغینگ هم، اۉچاغینگ هم بیر پول» دېب، اۉزینی بو مقامگه حقلی دېب بیلردی. خلص ساچدن تیرناققه چه بو مقامگه اۉزی نینگ مناسبلیگینی تارتیشیب، هیچ کیمدن هیچ قندی کملیگی یۉقلیگینی اثباتلشگه تیریشردی. شو اثناده آرقهده اۉتیرگن بیر عضو یاقیمسیز آواز بیلن: «مېن رهبرمن» دېب همهنی کوتیلمهگن بیر وضعیتگه تشلب قۉیدی« سېن بو مقامگه مناسب اېکنلیگینگگه دلیلینگ بارمی؟» دېب سۉرهدی اوندن قورولتای اعضاسیدن بیری. « مېن دلیل۔پلیلنی بیلمهیمن، رهبرمن دېدیم می، رهبرمن.» دېدی او.« عقلینگ جاییده می، نیمه دېیاتگنینگنی بیلهسن می؟» دېدی باش اونینگ بو بېباشلیگینی جلولهماقچی بۉلیب.« مېنگه عقل اۉرگتیش نینگ حاجتی یۉق، گپیم بیرته، مېن رهبر بۉلهمن دېدیم می، البتّه بۉلهمن» دېدی آرقهدهگی عضو اۉزینی اۉجرلیککه سالیب. بو هیچ کیم اوچون قبول قیلگودېک دعوا اېمس اېدی. شونینگ اوچون همه بیر آوازده: «یۉق، بیز سېنینگ رهبر بۉلیشینگگه یۉل قۉیمهیمیز» دېدیلر. خلص او «مېن رهبر بۉلهمن» دېب ایکّی ایاقنی بیر اېتیککه سالیب آلگن، قالگن اعضانینگ مخالفتی اېسه بېفایده اېدی. بو دعوادن باشلری قاتیب قالگن قورولتای اعضاسی قورولتای اۉز ایشینی اېرتهگه داوام اېتتیریشینی طلب قیلدیلر. رهبرلیک دعوا قیلگن عضو اېسه قدرتینی نمایش قیلیش مقصدیده اۉشه لحظهدن باشلب اۉزیگه قرهشلی قتناو یۉلینی مطلق تۉسیب قۉیدی. بونینگ نتیجهسیده ایچکی ایشلر اۉز ایزیدن چیقه باشلهدی... قورولتای نینگ ایکّینچی کونگی ییغیلیشی هم نتیجهسیز قالدی. سۉنگگی بحران یره اوستیگه چیپقان بۉلیب توشدی. تشقی وضعیت، ایچکی وضعیت تأثیریده فلج حالتگه کېلدی. بلآخره برچه اعضا رهبرلیک دعواسی بیلن اۉرتهگه چیققن عضونینگ، بو مقامگه مناسب بۉلمسه۔ده، رهبر بۉلیشیگه موافق رای بېریشگه مجبور بۉلدیلر.
نور اﷲ آلتای |
