افغانستان آيدين فرهنگي اويوشمه سي نينگ اساسنامه سي

بيرينجي فصل

تانیش نامه

بيرينجي ماده:

بو اويوشمه نينگ آتي «افغانستان آيدين فرهنگي اويوشمه سي» دير که آيدين افغانستان معني سي ياختي ليک و يارقين ليک دير.

ايکينچي ماده :

بو اويوشمه نينگ مرکزي افغانستان پايتختي کابل شهري قرار بيريليب انينگ بوليم لري ضرورتيکه کوره ولايت لر و اولسوال ليک لر ده ايجاد بوله دي.

اوچينچي ماده:

بو انجمن دولت نينگ نافذ بولگن قانون لريگه کوره اينيقسه اجتماعي سازمانلر قانوني گه کوره عمل قيليب تمامي مورد لرده اساسي قانون و اولکه نينگ اجتماعي سازمان لريدين پيرو ليک قيله دي.

تورتينچي ماده :

بو اويوشمه بير اجتماعي، غير دولتي، غير سياسي و فايده لنميديگان سازمان بوليب و هيچ بير سياسي سازمان لر وحزب لرگه باغليق  ايمس دير.

بيشينچي ماده :

بو اويوشمه ده بير اينيقسه نشاني بار بوليب اوني تعريفي موندن قرار :

ـ بو اويوشمه نينگ نشاني افغانستان نقشه سي دين عبارت بوليب که يير توغلاغي اوستيده قرار  تاپگن و افغانستان نقشه سينينگ ايچيده بير کتاب بار که اوني بير صفحه سيده بيليم (علم) و باقشه صفحه سيده فرهنگ بيتيلگن دور. علم و عرفان نينگ جرق له گن قوياشي کتاب نينگ اوستيده افغانستان تمام نقطه لريگه يارقين لش حالده دور و اوز ياختي سي بيلن عزيز افغانستان ني يارقين ايتگن دور و شو کبي کتاب نينگ آستيده گي بوليميده بير دانه رنگ بوتلي که بير دانه قلم اوني ايچيده که علم و بيليم ني کورساتوچي سي دور.

ايکينچي فصل

اويوشمه نينگ هدف و فعاليت لري

آلتينچي ماده :

بو اويوشمه نينگ اصلي هدفي بيرگه قيليش اينيقسه ييگيت لر افغانستان تويغولي خلقي  نينگ بر چت آستيده اولکه فرهنگ و بيليم سطحي نينگ يوقاري آليب باريش دور.

يتينچي ماده :

اويوشمه فعاليت لري موندن عبارت دير :مادي و معنوي ياردم مکتب لر، مدرسه لر و اوقو يورتلرگه بيليم اوستيريش عرصه سيده.

 ــ اوقوو يورتلر و تخنيکي شاپ لر ني اساس لشتيريش ضرورتگه کوره امکانات باريچه.

ــ عرف،  عادت لر، عنعنه لر ني تانيتيش، تيرگيزيب و ساقلش، افغانستان خلقي نينگ (فولکلوريک ارزش لريني).و بو توغريده علمي وفرهنگي ايش لر توزه له  دي.

ــ توليق و ييترلي انسان لرني اورته گه کيلتوريش اوچون کيم جامعه ميزني اولرگه کوپ قتيق ضرورتي بار، انفرادي و يا قوشمه تور ده علمي تحقيقات، اقتصادي و اجتماعي فعاليت لريني بجريش رسمي موسسه لر و شونگه اوخشش اجتماعي سازمان لر بير لشماقي بيرلن.

ــ ياردم تأمين لش که آيليک معاش، کتاب و قرطاسيه، اييم، کييم و باشقه اوقوچي و بي بضاعت محصل لردن عبارت دير.

ــ بو اويوشمه اوز هدف لريني تحقق بيريش اوچون علمي تحقيق لر، کنفرانس لر، علمي و فرهنگي اولتيريش لر داير ايته دي.

ــ بو اويوشمه ييگيت لر ني شوق گه کيلتيريش اوچون، تعليمي،  هنري، ورزشی و فرهنگي و تربيتي کورساتو لرني تنظيم بيره دي.

ــ بو اويوشمه افغانستان نينگ تمام نقطه لريده فعاليت ايته دي.  

اوچينچي فصل

تشکيلاتي توزاتو   

ــ عمومي مجمع    

ــ مرکزي شورا   

ــ رييسه هيأت   

ــ کنترول و تفتيش هيأتي    

ــ محلي نماينده لر       

عمومي مجمع :

سيکيزينچي ماده :

عمومي مجمع و يا کنگره هر ييلده جوزا آييده که اونينگ داير بوليش تاريخي و برگزار ليک جايي رييسه هيأت تمانيدن  تعيين لنیب، داير بوله دي.

توقوزينچي ماده :

عمومي مجمع ده بو وظايف و صلاحيت لر بار دير :

ــ انتخاب صلاحيتي، رييسه هيأت، تفتيش هيأتي و کنترول ني عزل (توشيريش) صلاحيتي عمومي مجمع ده بار دير.

ــ  اويوشمه باشليغي ايش و فعاليتي نينگ گزارشي ني ايشيتماق.

ــ  اويوشمه نينگ اساس نامه سي نينگ تصويب و يا تغيير و تعديل ايتيش.

ــ لازم بولگن صورت ده اويوشمه نينگ آتي ني اوگوريش.

ــ اويوشمه باشليغي استعفا يا عزل قيلينگن صورتده، رييسه هيأت لازم کوريشي بيلن ايکي آي آره سيده اضطراري کنگره تاريخ و جاييکه رييسه هيأت تمانيدن تعيين قلينه دي، داير بوله دي.

ــ اويوشمه اعضا سينينگ، شکايت، انتقاد و  پيشنهاد لريني تيگشيريش.

ــ رييسه هيأت تفتيش و کنترول هيأتي ني سيلش سري و يا توغري تور ده.

مرکزي شورا

اونينچي ماده :

مرکزي شورا عمومي مجمع دن سونگره اويوشمه نينگ اينگ عالي تصميم آليش مقامی ايرور.

اون بيرينچي ماده :

مرکزي شورا، رييسه هيأت، و محلي نماينده لريدن توزلگن ايرور.

اون ايکينچي ماده :

اويوشمه باشليغي عيني پيت ده مرکزي شورا باشليغي گه هم عهده دار ايرور.

اون اوچينچي ماده :

مرکزي شورا هر آلتي آيده بير مراتبه اکثريت اعضا قتنشماقي بيله اولتيريش داير ايتور. لازم کورينگن صورتده مهم موضوع لرگه تصميم آليش ايليک فايز شورا اعضا سي تقاضا سيگه کوره فوق العا ده جلسه داير بوله دي.

اون تورتينچي ماده :

مرکزی شورا نينگ وظايف و صلاحيت لري

ــ رييسه هيأت نينگ گزارشي نينگ ايشيتماق

ــ محلي نماينده لرني گزارشي نينگ ايشيتماق.

ــ اويوشمه فعاليت لريني پلان و پاليسي سی نينگ تعيين و تثبيت قيليش.

ــ ايش لر ني يخشي لش اوچون ينگي استراتيژي لر تعيين لش.

ــ مرکزی شورا، رييسه هيأت، تفتيش هيأتي، و کنترول نينگ تعيين و عزل قيله آلميدي.

رييسه هيأت

اون بيشينچي ماده :

اويوشمه باشليغي، رييسه هيأت باشليغيده قرار تاپيب ايکي اورون باسري بوله آله دي.  

اون آلتينچي ماده :

اويوشمه رييسه هيأتي، هيأت تفتيش و کنترول و عمومي  مجمع توغريسيده مسـوول و جواب بيروچي دور.اويوشمه رييسي، اورين باسر لر، استعفا سيني قبول و يا قيته ريب بيله دي.

اون يتينچي ماده :

اويوشمه نينگ باشليغي و يا اورين باسر لري کوپ چيليک رأييني قولگه کيلتوريش بيلن عمومي  مجمع ده ايرکين راي آليش بيلن، توغري و يا ياشيرين سيلنه ديلر.

اون سيکيزينچي ماده :

بير نفري که اوزيني باشليغ و يا اورين باسر تورده کانديد ايته دي بايد بو صفت لر اونده بولسه.

ــ افغانستان تبعه سي بولسه.

ــ هيچ بير اجتماعي سازمان لر ده عضويتي بولمسه.

ــ عالي تحصيلات ايگه سي بولسون.

ــ ياشي  ايگرمه بيش دن کوپراق بولمه سون.

ــ کانديد بولمس دن آلدين جنايي دوسيه سي بولمه سون.

ــ حسنه اخلاق ليک، ايش اهليتي، و يترلي تجربه سي بولسون.

اون توقوزينچي ماده : 

رئيسه هيئت نينگ بو صلاحيت و وظيفه لري بار دير.

ــ بو اساس نامه نينگ اجراسيدين مراقبت ايتيش.

ــ بو اويوشمه نينگ فعاليت لريني اساسي خط لريني تعيين لش.

ــ محلي نماينده ليک لرني قوريش.

ــ هر اون بيش کونده هيئت رئيسه نينگ اولتوريشي ني قوريش که او تاريخ هم اويوشمه باشليغي تماندن تعيين بوله دي.

ــ محلي نماينده لريني تعيين و يا عزل قيليش.

ــ باشقه بو اساس نامه گه درج بولگن وظيفه لر.

ايگيرمه نچي ماده :

اويوشمه نينگ اورین باسر لرينينگ وظيفه لري:

بيرينچي اورین باسر فرهنگي ايش لرني مسئولي بوليب که بوبوليم، اورگه نيش بوليم لر، تربيتي، تبليغاتي، و ينگره تيش بوليم لرگه شامل دير. اينکينچي اورون باسر مالي بوليم لر باشليغي ده قرار تاپه دي.

ايگيرمه بيرينچي ما ده:

اويوشمه رئيسه هيئتي مهم و حياتي مسئله لر توغريسيده اعضاء رأي لريگه مراجعه قيله دي.

ايگيرمه ايکينچي ماده :

اويوشمه رئيسه هيئتي بو اساسنامه نينگ صلاحيت لريني اجرا قيليش توغريسيده بو اويوشمه منفعت لريني مراعات ايته دي.

ايگيرمه اوچينچي ماده :

اويوشمه رئيسه هيئتي وظيفه نينگ دوشيگه آليش پيتيده اوز مقاميدن، شخصي، قومي، منطقوي، حزبي، و مذهبي لحاظ لردن استفاده قيليب بيله  آلميدي.

ايگيرمه تورتينچي ماده :

اويوشمه نينگ باشليغي استفعفا و يا عزل بولگن صورت ده، بيرينچي اورين باسر تا سونگره کي باشليغ سيلانگونچه باشليغ نينگ صلاحيت و وظيفه لريني عهده سيگه آله دي.

ايگيرمه بيشينچي ماده :

اگر بير پيتده رئيس نينگ اورين باسر لريدين بيري استعفا قيلسه ويا عزل بولسه اويوشمه رئيسي تمانيدين اعضا لردن بيري اورين باسر حيثيده تعيين بوله دي.  

ايگيرمه آلتينچي ماده :

اگر بيران پيتده اويوشمه باشليغي بو اويوشمه نينگ هدف و اساس لري قرشيسيگه حرکت قيلسه مرکزي شورا  نينگ تفتيش و کنترول هيئتي  پيشنهادي بيلن فوق العاده اولتوريش داير ايته دي و بو  اولتوريش ده ايلليک فيصد اعضا تأييدي آرقه لي باشليغ ني وظيفه دن عزل و ايکي آي آره سيده عمومي مجمع داير بوله دي.

ايگيرمه يتينچي ماده :

اويوشمه اساس چي لريدين باشقه، نفري که اوزيني رئيسه هيئت و تفتيش و کنترول هيئتي کانديد ايته دي بايد حد اقل آلتي آي آلدين بو اويوشمه نينگ عضويتي ني قولگه کيلتورگن بولسه.

تفتيش و کنترول هيئتي

ايگيرمه سکيزينچي ماده :

تفتيش و کنترول هيئتي اوچ عضو دن اورته گه کيلگن  دير که عمومي مجمع ده ايرکين سيله نيش بيلين سيله نه دي.

ايگيرمه توقوزينچي ماده :

بو هيئت بير کيشي ني اوز اعضا لريدين باشليغ حيثيده تعيين ليدي.

اوتوزينچي ماده :

هيئت تفتيش و کنترول نينگ وظيفه وصلاحيت لري :

ــ بو هيئت نينگ صلاحيتي بار تا رئسيه هيئت نينگ همه ايش لريني هر پيتده که خواهلاسه تفتيش و کنترول قيله آله دي.

ــ بو هيئت نينگ وظيفه سي بار بو اويوشمه نينگ مالي وجه لريني هر تور اختلاس و سوء استفاده لريني تثبيت لب و آني آلديني آليش اوچون رئيسه هيئت گه هشدار ليگ بيرسه.

محلي نماينده ليک لر :

اوتوز بيرينچي ماده :

محلي نماينده لر ضرورت گه کوره رئسيه هيئت منظوري بيلن ولايت و اولسوال ليک لرده اورته گه کيله دي. اوتوز  ايکينچي ماده : محلي نماينده لر مکلف دير تا بو اساس نامه نينگ هدف و اساس لريگه کوره عمل ايتسه لر.

تورتينچي فصل

عضويت شرط لري، خارج بوليش، حق لر و اعضا بورچ لري

اوتوز اوچينيچي ماده :

جامعه فرد لريدن هر فردي ايرکک خواه خاتون که  اوتوز تورتينچي ماده ده درج بولگن شرط لر عمده بولسه بو اساسنامه نينگ مطالعه و قبول قيليب بو اويوشمه نينگ عضويتي ني کسب ايتيب بيله دي.

اوتوز  تورتينچي ماده :

 بو اويوشمه گه عضويت تاپيش شرط لر

ــ  افغانستان تبعه سي بولسون ــ ياشي اون سکيز دن کم بولمسون

ــ بو اويوشمه نينگ اساس و هدف لريني تحقق بيريش يولده مادتاً و معناً سعي و تلاش قيلسه.

اوتوز بيشينچي ماده :

اعضا اورته سيده هر خيل  تبعيض و فرق بيريش ممنوع بولگن اويوشمه نينگ همه اعضا لريني حق و وجيبه لري برابر دور.

اوتوز آلتينچي ماده :

بو اويوشمه نينگ همه اعضا لريني رأي آليش و رأي بيريش حق لري بار. همه اعضا  ايتيب بيله دير لر که اوز لريني رئيسه هيئت و تفتيش و کنترول هيئتي کانديد ايتسه لر.

اوتوز يتينچي ماده :

همه اعضا اويوشمه نينگ اوسيشي  اوچون اوز فکر لريني ايرکين تورده ايتيب بيلا آله ديلر.

اوتوز سکيزينچي ماده :

اعضا لردين هيچ بيري اساس نامه قرشي سيگه يوريب بيلميديلر. قرشي يورگن صورت ده 41 نچي ماده حکمي رئيسه هيئت تمانيدين تطبيق بوله دي.

اوتوز توقوزينچي ماده :

هر عضو مکلف دور تا بو اساسنامه گه مطابق بيرينچی ده 500 افغاني حق  الشمول و هر آيده اوز عوايدي دن ايکي فيصد حق العضويت آتيده بو اويوشمه گه تابشيرسه.  

قيرقينچي ماده :

بو اساسنامه دن پيرو ليک ايتيش اعضا لر ني اساسي وظيفه لريدين دير. که بو اساسنامه دن خبر سيز ليک عذر قبول قيلينميدي.

قيرق بيرينچي ماده :

اويوشمه دن چيقريش شرط لر

ــ هر عضوي که اويوشمه نينگ هدف و اساس لري قرشيسيگه يول يورسه.

ــ هر عضوي که اعضا اورته سيده وجداني تبعيض سببي بولسه.

ــ هر  عضوي که قومي، مذهبي، منطقوي و حزبي مسئله لر ايتاکيگه قول اورسه.

ــ هر عضوي که بو انجمن دن اوز شخصي مفاد لريگه استفاده قيلسه.

ــ هر عضوي که حق العضويتيني آلتي  آي  اوستمه  اوست تابيشرمه سه، قيد و شرط سيز رئيسه هيئت تمانيدن عضويت دن چيقاريله دي.

فصل پنجم

مالي  ايش لر و تمويل لش منبع لر

قيرق ايکينچي ماده :

بو اويوشمه حق الشمول، اعضاي آيليک حق العضويتي و اويوشمه اعضا سينينگ مالي ياردم لري، تويغو لي اولکه داش لر، ياردم قيله ديگن موسسه لر و ملي تاجر لر ذريعه سي بيله تمويل بوله دي.

قيرق  اوچينچي ماده :

بو اويوشمه ايته آله دي مالي ايش لريني تمويل ايتيش اوچون جريده لر، کتاب لر، طبع و ساتيش و کورساتو لر داير قيليش بيلن اوز اقتصادي گه يخشي ليک بيرسه. ايتيليب اوتگن مورد لر ده لازمه جواز تيگيش لي مقام لر دن آلينه دي.

قيرق تورتينچي ماده :

اويوشمه نينگ  ايکينچي اورين باسري  عين پيتده مالي ايش لرني مسئوولي بوله دي.

قيرق بيشينچي ماده :

مالي بوليم نينگ مسئوولي رئيسه هيئت و مرکزي شوري توغريسيده مسئوول و جواب بيره ديگن بوله دي.

قيرق آلتينچي ماده :

مالي مسئوول نينگ صلاحيت و وظيفه لري موندن عبارت دير :

ــ اعضا دن حق  الشمول و حق العضويت ني ييغيب آليش.

ــ تويغولي اولکه داشلرني ياردم لريني اوزیگه قره تیش ايتيش.

ــ اويوشمه نينگ مصرفيني مالي وجه لري، اويوشمه نينگ هدف و اساس لري توغريسيده اويوشمه نينگ باشليغي ني تأييدي بيله.

قيرق يتينچي ماده :

همه ياردم لر افغانستان هر نقطه سيده ضرورت و محلي نماينده ليک لر عوايدي گه کوره صورت تاپه دي. محلی ضرورتي گه کوره و يا محلي عوايد لر کفايه سيز ليگيده، رئيسه هيئت  تصميم آليب لازمه ياردمي ني مرکز نينگ مالي بودجه سيگه کوره بجره دي.

قيرق سکيزينچي ماده :

او صورتده که مالي بوليم نينگ خلاف يوريشي و يره مس استفاده سي تفتيش و کنترول هيئتي تمانيدن تثبيت بولسه و يا استعفا، ويا عزل بولگن حالده اويوشمه باشليغي باشقه بير نفر ني که ايش و صداقت اهلي بولسه تا کنگره داير بولگينچه موقتي تور  ده سيلاب مالي بوليم مسئوولي حيثيده تعيين قيله دي.

آلتينچي فصل

متفرقه حکم لر

قيرق توقوزينچي ماده :

تصميم آليش اويوشمه نينگ انحلال توغريسيده عمومي مجمع ده آلينيب اعلان بوله دي. اويوشمه انحلالي دين سونگ مالي وجه لري بير اجتماعي سازمان کیم انينگ هدف لري بو اويوشمه گه يقين بولسه انتقال بيريله دي.

ايليکينچي ماده :

هيچ خيل تبعيض و قومي امتياز، مذهبي، منطقوي و حزبي بو اويوشمه اعضا سي اورته سيده بولا آلميدي.ايليک بيرينچي ماده :بو اويوشمه بير مرفه و مترقي جامعه اورته گه کيلتوريش اوچون که انده اجتماعي تينگليک و انساني کرامت سقلانسه فعاليت ايته دي.

ايليک ايکينچي ماده :

آيدين افغانستان فرهنگي اويوشمه سي نينگ اساس نامه سي آلتي فصل و 52 ماده ده تنظيم بوليب و مربوط مرجع تأييدي بيلن نافذ بوله دي.