یکشنبه آقشام (سنبله آیی نینگ 22.ینچیسیده) پایتخت کابل ده آیدین افغانستان فرهنگی انجمنی نینگ ایککینچی قورلتایی بولیب اوتدی. قورلتای دن اساسی مقصد آیدین انجمنی نینگ رهبرلیک هیئتی و کیلگوسی فعالیتلریگه ینگی یول یوروق تنلش ایدی. اوشبو قورلتای گه افغانستان نینگ شمال و شمال شرق ولایتلریدن کیلگن یوز گه یقین انجمن اعضاسی و باشقه مهمانلر قتنشگن ایدیلر.

قورلتای آقمیده آی دین افغانستان فرهنگی انجمنی نینگ اعضاسی سری و مستقیم بیر سیلاو آرقه لی ینگی رهبرلیک هیئتی نی تنله دیلر. سیلاو نتیجه سیده حرمتلی صبرالدین رحمانی جنابلری کتته بیر رقم رای نی قازانیش بیلن انجمن نینگ ینگی رئیسی صفتیده تنلندی. رحمانی جنابلری انجمن نینگ کیلگوسی فعالیت لرینی تاباره کینگیتیریشینی سوز بیردی. شو یوزدن رحمانی جنابلری، کیله جکده کوزله گن مقصدلریگه ایریشیش اوچون اوزی نینگ ایش یوریته یاتکن تیمی نی تانیشتیردی. ینگی رهبرلیک هیئتی حرمتلی محمد داود قیومی و امرالدین قربان جنابلری بیرینچی و ایککینچی اورین باسرلر صفتیده وظیفه لنتیریلگن. سیلاو توگه یشی بیلن انجمن نینگ ایسکی باشلیغی حرمتلی محمد عارف صدری سیلاو نتیجه سینی آلقیشلب، رحمانی جنابلری نینگ موفقیتی نی تبریکله دی.

 آیدین افغانستان فرهنگی انجمنی تورت فعال کمیته لری (مدنی، علاقه لر، مالی و تعلیم تربیه) یانیده رهبرلیک هیئت مصلحتچی لری و تیکشروچی بولیملرینی هم تانیشتیردی. قورلتای آقمیده آیدین افغانستان فرهنگی انجمنی نینگ اوتکن بیش ییل دوامیده عملگه آشیرگن فعالیتلری حقیده تولیق معلومات بیریلدی. همده اوزاق-یقین دن قتنشگن انجمن اعضاسی و باشقه مهمانلر مذکور انجمن نینگ فعالیتلرینی یخشی راق یوریتیلیشی اوچون بیر ییللیک یاردملرینی سوز بیردیلر. عین حالده انجمن اعضاسی اوتکن بیش ییل دوامیده بیر قطار موفقیتلی فعالیتلرنی بجرگن ایسکی باشلیغ محمد عارف صدری جنابلری نی تقدیرله دیلر. آیدین افغانستان فرهنگی انجمنی بوندن قریب بیش ییل آلدین ترکیه ده عالی تحصیلات کورگن بیر گروپ یاش ییگیت لر تمانیدن قوریلگن. اوشبو انجمن اساسآ تعلیم و تربیه، مدنیت و خیریه فعالیتلری بیلن شغللنیب کیلماقده. بو ساحه لرده گی برچه خرجت لر انجمن نینگ اعضاسی تمانیدن یاردم ایتیله دی. حاضرگه چه آیدین افغانستان فرهنگی انجمنی نینگ فاریاب، سرپل و تخار ولایتلرده گی اوقو مرکزلریده یوزلب اوقوچیلر تورلی ساحه لرده سواد اورگنیب، افغانستان نینگ اینگ مشهور عالی اوقو یورتلریگه یول تاپکن لر. آیدین انجمنی نینگ اعضاسیگه کوره، اوشبو فعالیتلر بوندن بیش ییل آلدین ایکیلگن آدینلیک نهالی نینگ کیچیک بیر میوه سی دیر. آیدین انجمنی نینگ جامعه گه تقدیم ایتکن فعالیتلریدن کوپراق، اوشبو انجمن نی قنده ی قوریلگنی، نیمه مقصدگه قوریلگنی و قیسی بیر شکلده فعالیت آلیب باریشی کوپراق دقت گه سزاوار. چونکه ایریم کوزه توچیلرگه کوره، بوندن آلدین هم مینگلبچه افغانستان لیک ییگیت لر روسیه، امریکا و اروپا مملکت لریده درس کورگن لر. اما هیچ بیریسی ترکیه ده اوقیگن اوقوچیلر کبی بیرلیک و بیردملیکلرینی سقلشگه قادر بولمه گنلر. باشقه تماندن اوشبو یاش ییگیت لر افغانستان کیله جگینی آیدین لتیش اوچون اوزلری نینگ مادی و معنوی امکانیتلرینی اورتگه قویش بیلن، جامعه ده ینگی بیر فرهنگ نی رواجلنتیرماقده لر. هرچند ترقیات چوقیسیگه ایریشگن اولکه لرده اهالی نینگ یاردملری بیلن اینگ بویوک ایشلرنی یولگه قوییلگنی عجبلنتروچی بیر ایش ایمس. اما 30 ییللیک اوروش، عدالت سیزلیک، قراقچیلیک، ظلم و ستم نی باشیدن کیچیرگن افغانستان کبی قشاق بیر اولکه ده رواج تاپه یاتکن فداکارلیک فرهنگی، بویوک بیر دقت و اعتبار گه سزاوار. آیدین افغانستان فرهنگی انجمنیده اولکه میزنینگ تورلی ولایتلریدن اعضا بولیب، بولر هر دایم وطنداشلریمیزنینگ بیرلیک و بیردملیگی نی سقلش اوچون سعی و حرکت قیلیب کیلگن لر. شو مقصد بیلن انجمن نینگ قورلتایی اوتکندن کیین دوشنبه آقشامی (23. سنبله) کابل ده یولگه قوییلگن افطارلیک احتفالیده 200 گه یقین دولت ملازملری، فرهنگی شخصیت لر و یاش اولوغلر قتنشگن ایدی. اوشبو احتفال هم انجمن نینگ تورلی ساحه لرده قیلگن فعالیتلری حقیده تیارلنگن مستند فلم یانیده، انجمن باشلیغلری سوزگه چیقیب قتنه شووچیلرگه معلومات بیردیلر. قتنه شووچیلر وکالتی بیلن کابل ده گی فاریاب لیک قوملر شوراسی نینگ باشلیغی حاجی محمد همایون جنابلری سوزگه چیقیب، آیدین افغانستان فرهنگی انجمنی نینگ قیلگن فعالیت لرینی تقدیرله دی. همده او، بو ساحه ده باشقه بای و به دولت وطنداشلریمیزنی هم یاردمچی بولیشگه چقیردی.

آیدین افغانستان فرهنگی انجمنی حاضرگه چه عملگه آشیریب کیلگن فعالیتلری یانیده مطبوعات و سپورت ساحه سیده جدی آدیم لرنی کوتاریش نیتیده.